Bu tsulal..

I tgallit yeskiddiben

D acu n tigdi tesεa !?

Ayen ur tt-yettqeṛṛiben

D asalu tezla lqaεa

Ttlalen-d iqezziben

Ttemseftayen d usmuɣben

I d-yuǧǧwen irbiben

Almi εebden Sebεa

.........

I ukeddib yettgallan

D acu n tebɣest yelsa !?

Yedden, ddmen-t imawlan

Tuget d wid n Xemsa

Laṣel yesεa iseflan

Mi d-llan, d anza i d-glan

Glan-d yes-neɣ d aklan

Yeḥzen wulli i neksa

...........

I tfenṭazit ur ɣ-ittun

D acu teẓẓa mi teɣza !?

Yexza-tt win yettarun

Neɣ twerd-itt tirza

Almi yebra umdun

I ɣ-yekkukra waldun

Xas idammen teddun

Tikli tezzi ma tezza

..........

I Teqbaylit yettilin

I melmi-yas taggara !?

D zzman i tt-yettqilin

Imdanen dlen-as tuffra

D agujil win yettwalin

D aderɣal win yettalin

A nnger-ik a bu tmedlin !

Tefrefr-aɣ tafrara

                                                                                                                                              Genzat (Lakav)

                                                                                                                                          08 Ɣuct 2014

                                                                                                                             00:40