Wid n tqurant..
Neqqaṛ werǧin nekna
Ur nqudeṛ ibeddi
Neqqaṛ nebɣa lehna
Ɣef tlisa-s ur neddi
Dɣa nemser si tmenna
Neqquṛ di tin n Jeddi
Almi d-nesεa takna
I ɣ-yerran nennuɣna
Neggul ur tettεeddi
Tiddi s uɣunzu di ccna
Neqqaṛ nessen i tuna
Wissen ma yessen-aɣ zeddi !
Neqqaṛ tili tefna
Ziɣ deg unnar i tundi
Dɣa neqquṛ si tmenna
Almi ɣ-tuɣal d deddi
Nettcuḥḥu ma nebna
Neldi afus i tmerna
Σennaɣ-k ay amḥaddi
Si temḍelt ar ttberna
Neqqaṛ yerna mazal
Azal ad t-nesfunzer
Neqquṛ nettargu azal
Amzun ur nesεi inzer
Nettemzal ur nettazzal
Luḍa-nneɣ d asikser
Ad ɣ-yesmeḥ kan uzzal
I ufrag kan i imazal
Nettwazger, nettwagzer
Nettegray i uεzal
Neqqaṛ, neghem awal
Almi ɣ-yedhem usenser
Neqquṛ di ciṭ n ccwal
I yessenɣad usberber
Yettuɣaḍ uɣerbal
S ubeqqa mi s-nekker
Di tuzzya nettḥawal
Ɣer tuṭṭfa nettɣawal
D aḍu neɣ d askeεrer
Nufaf nnig tikwal