REBBI N TMEṬṬUT..

Amzun d tameṭṭut n Rebbi !

Di tmurt yeḥwaǧen Rebbi
Akken teḥwaǧ tameṭṭut
Wehmeɣ amek tettεebbi
Yerna tkennu i terbut
Ur tt-yettsawam usurdi
Xas ur tt-telsi tqendurt
Tectaq meskint amḥaddi
Siwa ma teḥma teccuyt

Ahat d tameṭṭut n Rebbi !

Di tmurt yeḥwaǧen Rebbi
Amzun d aksum n tmeṭṭut
Medden εuhden ibeddi
Siwa tassemt ur nemmut
Am yiɣyal ur nettεebbi
Tabarda gan-as tafsut
Wehmeɣ yumes yirebbi
Iweccem akk tayendurt

Aziɣ d tameṭṭut n Rebbi !

Di tmurt yeḥwaǧen rebbi
Ula di lḥewǧ n tmeṭṭut
Ḥwaǧen-t kan d iciddi
Ɣer teḥlalt taneggarut
Yeldi ubrid i uεeddi
Taxatemt teẓẓeg tagut
Fell-ak taẓallit a nnbi
Di lmeεruf tezga tusut

A ddin Rebbi n tmeṭṭut !

Di tmurt yeḥwaǧen rebbi
Ccah tettɣiḍ tmeṭṭut !
Teqbel akken ad trebbi
S tedmart teǧǧa tatut
Tatut tenker ibibbi
Aqerrec la yettkuffut
Mi tfaq twekkel rebbi
Win i s-d-snulfan d ttbut

Nniɣ-ak d tameṭṭut a Rebbi..