AḤUDDU AḤULFU..

Ad wen-d-ḥkuɣ ɣef taddart

Mi ara d-ḥelliɣ tamrart

Nettat teččur yes-i

Nekk ččureɣ asebsi

Allaɣ-iw yeɣleb tagmert

Di taddart-iw hat-aya

I wid yessnen amazul

Ussan xellsen lexṭiyya

Asmi ẓẓullen s wazul

Tettwakkes-asen lǧerya

Rnan ddurin agzul

Sirta teẓẓuɣur Mya

Taqbaylit-iw tif anẓul

Ḥekkuɣ-awen-d ɣef taddart

Tin i teǧǧa temɣart

Nutenti llant yes-i

Mi ara yefsi usebsi

Allaɣ-iw d imi n tegmert

Di taddart-iw assaɣen

Ugaren-k ay aẓerẓur

Amyag yefti d imyaɣen

Leflani am unaẓur

Yessufeɣ-d i imerriɣen

D agejdur i t-yezzuzur

Simmal messden yidɣaɣen

Deg tussatin yesfunzur

Ad wen-d-ḥekkuɣ ɣef taddart

Yettkanzin ar tesɣart

Nettat daxel uḍebsi

Yecban aclim deg usebsi

S allaɣ-iw rekben-d tagmert

Di taddart-iw d ameḥzun

Yerna lasel d agujil

Taseggast ara d-yerzun

Deg-s tiktiwin d lǧil

Duǧember i t-yettruẓun

D Yennayer a Linǧil

Yennayer i t-yetthuzzun

D acedluḥ win ur neɛjil

Ḥkiɣ-awen-d ɣef taddart

Xas d iqiḥ si tezmert

Nettat ɣur-i d imensi

Yessumten asebsi

Yerǧan allaɣ n tegmert