Gar tacciwin..

Ɣer nnig wayen akk yellan
Wwiɣ tudemt-im d aɛwin
Allaɣ-iw ur yettgallan
Yessen aḥnat n tlawin
Yessen nnehtat yeḥlan
Yessemɣay-d tafriwin

Ma d kemm !

Ma d kemm tɛecqeḍ aklan
Tessneḍ-asen tamiwin
Tetturareḍ iseflan
Tkennuḍ gar tacciwin

. . . . . .

Di nnig wayen akk yellan
Yedda yisem-im d asteqsi
Yal isem yesɛa imawlan
Kemm isem-im yugi ad tt-yefsi
S yilem yexneq izlan
S kennu yettzux teɣzi

Ma d nekk !

Ma d nekk yuɣalen d Flan
Tɛeqleḍ ile myes-i
Cebbeḥ s yilem ussan
Ad kem-cerrgeɣ deg usebsi

. . . . . .

Si nnig wayen akk yellan
Seḥlayeɣ kra yettilin
Tafsut tezmeḍ iɣeblan
Fell-am terra timedlin
Dɣa dayenni d-glan
Inzizen-im n tayriwin

Dɣa !

Dɣa huzzeɣ-ten asmi d-slan
Tufiḍ tifeḍ iman-im
Tura igenwan-im knan
Yesɛa-ten wakal d aglim

. . . . . .

War ayen akk yellan
Acek-ikem i usmekti !
Tecfiḍ mi ɣ-d-ttẓallan
Widen iebden tikti
Tecbiḍ lekfen yexlan
S yilem, yecbeḥ yefti

∑ɛaqq !

∑ɛaq i Sidi amdan
Ma tcetleḍ-d seg-s tikli
Seknu-d i tfekka-m uglan
Sɛan-kem waklan d iswi

 
                                                                                                        Targa Uzemmur
                                                                                                     25 Yebrir 2015