Imi n nnaqus..

Si lebni n tlalit

Ar usefru unhit

Seg yizir umrit

Ar yiɣimi ucmit

Seg unẓad n telkit

Ar teɣzi n tseldit

.........

Yeggul wul-iw s teḥcict

Rnu timẓin yeẓẓden

Ay isefra n weswir

Seg-wen sefḍeɣ taqcict

Rriɣ-tt kan d asuden

Ma d tasertit s wecwir

Ay addaynin d teεrict

Ay aṭerḍeq yemmden

Da i temda ad yezwir

.........

Seg usefru n tlalit

Ar lebni unhit

Seg yiɣimi umrit

Ar yizir ucmit

Si teɣzi n telkit

Ar wenẓad n tseldit

.........

Yeggul wul-iw s tuḥsift

Rnu ccḥani i ibezgen

Ay asentel n wesmir

Skelseɣ-k am tesfift

S Teqbaylit n walugen

S yes-s kan i nettizmir

Nniɣ-tent ak i tnifift

Ula d Yiwen igen

Am nekni yettdemmir

..........

Si lebni unhit

Ar usefru n tlalit

Seg yizir ucmit

Ar yiɣimi umrit

Seg unẓad n tseldit

Ar teɣzi n telkit

.........

Gulleɣ s yimi n nnaqus

Ɣef yibeddi n ureqqas

Deg wanda yelma lqis

Ussan ur nesduqus

Wehhan-d ak tisuqas

Tiṭ-iw yeεmer ssuq-is

I tεerqeḍ a lḥerqus

Aqerru d aweqqas

Tizi rwiɣ aseqqi-s

..........

Seg usefru unhit

Ar lebni n tlalit

Seg yiɣimi ucmit

Ar yizir umrit

Si teɣzi n tseldit

Ar unẓad n telkit

..........

Gulleɣ s yimi n ucaqur

Mi yi-ɣedrent tseqqar

Anda uɣeɣ aceqqir

Uḍan-iw ur neqqur

Wehhan-d ɣur-i aεeqqar

Udem-iw yeggra i uḥeqqir

Sbureɣ-k ay ameḥqur

Tikli deg buneqqar

Amecwar yettzenqir